02السيره النبوية --الحلقة الثانية ---تاريخ مكه -1

تاريخ مكه بسم الله والحمد لله والصلاة والسلام على رسول الله هنكمل دروس السيرة النبوية على صاحبها الصلاة والسلام وهنشرح ان شاء الله كل جوانب السيره وقبل مانروح لميلاد النبى وبعثته لازم نعرف تاريخ مكه وتاريخ قريش وكمان لازم نعرف مظاهر الحكم والحياه والدين فى جزيرة العرب قبل البعثة ونعرف كمان الحضارات اللى كانت منتشرة فى الارض والاديان الموجوده فيها وده علشان نقدر نستوعب حالة الناس وخصوصا العرب ونعرف اهمية الاسلام فى التغير وعلشان نستحضر مدى التعب والعناء والاذى اللى طال النبى و الصحابه بعد كده هنقسم السيره الى اجزاء وهى ميلاد النبى وطفولته وشبابه والنبى قبل البعثه مباشره بعثة النبى ونزول الوحى بداية الدعوه السرية الجهر بالدعوه هجرة النبى الى المدينه وقيام الدوله ووفاته بعدها الدروس المستفاده من دروس السيره وحلقتنا النهارده عن تاريخ البناء للكعبه عبر التاريخ مكّة المُكرَّمة موجوده في الجزء الغربيّ من السعودية، وهى عبارة عن مجموعة جبال واوديه زى جبل أجياد وجبل أبي قُبَيس ، وجبل قعيقعان ودول يطلق عليهم الاخشبين ، وجبل حراء ؛ جبل ثور ومجموعه من الاوديه زى وادى ابراهيم ووادى الزاهر ووادى محسر يعنى زى ماحنا شايفين ان مكه عبارة عن منطقة صحراوية مليانة جبال مرتفعة يعنى بالمنطق البشرى غير مرغوب العيش فيها ولكن بالرغم من كده قال النبى عنها يوم خروجه منها للهجره :(واللَّهِ إنَّكِ لخيرُ أرضِ اللَّهِ، وأحبُّ أرضِ اللَّهِ إلى اللَّهِ، ولولا أنِّي أُخرِجتُ منكِ ما خرجتُ). واكد النبى على مكانتها يوم الفتح فقال (إنَّ مكةَ حرَّمها اللهُ ولم يُحرِّمْها الناسُ . وده لانها بها الكعبه اول بيت للناس فى الارض قال تعالى ( إن أول بيت وضع للناس للذي ببكة مباركا ) يعنى مكه واخده قدسيتها وبركتها ومكانتها بسبب الكعبه وهنا بقا هنتكلم عن اهم معلم من معالم مكه و من معالم الجزيرة العربية وهو الكعبه ومن هنا هنبدا نستعرض تاريخ مكه وازاى اثرت الكعبه فى كل احداثها بل تكاد تكون الكعبه هى مركز الحدث بناء الكعبه الروايات التاريخية أن الكعبة بنيت 12 مرة عبر التاريخ وذكروهم كالتالى الملائكة وآدم وشيث بن آدم وإبراهيم وإسماعيل والعمالقة وجرهم وقصي بن كلاب وقريش وعبد الله بن الزبير عام 65 هـ، والحجاج بن يوسف عام 74 هـ، والسلطان مراد الرابع عام 1040 هـ. لكن اوثق الرويات هما اربع مرات البناء الاصلى وهو بناء سيدنا ابراهيم كما جاء فى القران وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا ۖ إِنَّكَ أَنتَ السَّمِيعُ الْعَلِيمُ (127) تانى بناء وهو بناء قريش وده كان قبل البعثة النبوية بخمس سنين،كان الجميع خايف انه يقرب من الكعبه حتى لاينزل عليه العذب زى مانزل باصحاب الفيل فقام الوليد بن المغيره الى الكعبه وبدا الهدم ولما شاف الناس انه محصلش حاجه للوليد قاموا معه فهدموها وبدء البناء واختلف الناس اثناء البناء في وضع الحجر الأسود في موضعه من البناء حتى احتكموا إلى النبي صلى الله عليه وسلم في القصة المشهورة، واشترك عليه الصلاة والسلام في بنائها تالت بناء وهوبناءعبد الله بن الزبير: هدم ابن الزبير الكعبة وبناها على قواعد إبراهيم ودخل فيها حجر إسماعيل وعمل فيها بابين شرقى وغربى ملصقين للأرض وده تحقيقا لرغبة النبى زى ما سمع عبدالله من خالته عائشة أم المؤمنين عن رسول الله صلى الله عليه وسلم أنه قال "لولا أن الناس حديث عهدهم بكفر وليس عندي من النفقة ما يقويني على بنائها، لكنت أدخلت الحجر ولجعلت لها بابًا يدخل الناس منه، وبابًا يخرجون منه" قال ابن الزبير فأنا أجد من النفقة ولست أخاف الناس، ولا بد من تحقيق رغبة النبي عليه الصلاة والسلام. اما البناء الرابع: وده لما قتل ابن الزبير كتب الحجاج لعبد الملك بن مروان يقوله أن ابن الزبير بني الكعبة على غير ما بنته قريش فكتب إليه عبد الملك أنه يهدمها ويبنيها من جديد ويفصل حجر إسماعيل عنها ويعمل لها بابًا واحدًا ويرفعه عن الأرض ومازالت الكعبة إلى الآن على بناء الحجاج باستثناء بعض التجديدات كتجديد الباب والسقف وما إلى ذلك في عهود العباسيين وسلاطين مصر والأتراك.والتجديدات اللى كانت بتتعمل نتيجة السيول او العوامل الجوية عموما ودى لاتعتبر هدم وبناء بالمعنى المقصود ممكن نقول ترميم لكن لما نقول هدم وبناء يبقى بنتكلم على صورتين الاولى الكعبه على قواعد سيدنا ابراهيم وعلى الوصف اللى وصفه النبى والتانيه على الصورة الموجوده حاليا وهو البناء اللى بناه اهل قريش قبل الاسلام المره الجاية ان شاء الله هنتكلم عن الحياة السياسية والحكم فى مكة من اول بنائها على ايد سيدنا اسماعيل لحد البعثة انتظرونى